(افهم السبب والحل)
من أكتر الحاجات اللي بتخض المزارع أو المستثمر بعد زراعة الفسايل، هي إنه يشوف الجريد بدأ ينشف ويجف، فيعتقد فوراً إن الفسيلة ماتت ويفكر يخلعها ويرميها! الحقيقة اللي لازم كلنا نعرفها ونثق فيها: جفاف الفسيلة لا يعني موتها على الإطلاق.
ما هي أسباب جفاف الفسيلة؟
السبب العلمي الأساسي والمباشر ورا الظاهرة دي هو: عدم التوازن بين المجموع الخضري والمجموع الجذري.
- الشرح ببساطة: لما بنفصل الفسيلة، كمية الجذور المتبقية فيها بتكون قليلة جداً وضعيفة، في المقابل بنكون سايبين عليها مجموع خضري كبير (الجريد والقلب).
- تأثير الفسيولوجي الضار: أول ما الفسيلة دي تتعرض لارتفاع في درجات الحرارة، أو عطش، أو رياح صحراوية شديدة، أو حتى نسبة ملوحة في الأرض، التأثير بيظهر عليها بسرعة الصاروخ.
- ليه بيحصل كده؟ لأن الجريد المتروك ده بيعمل عملية "نتح شديد" (يعني بيطرد وبيبخر الميه اللي جواه في الجو)، وفي نفس الوقت الجذور الضعيفة تحت الأرض مش قادرة تمتص ميه كفاية عشان تعوض الفاقد ده.
وعشان كده، الفسيلة بتضحي بالجريد الخارجي وتخليه ينشف كحماية ذاتية عشان تحافظ على الرطوبة جوة قلبها (الجمارة) ومتموتش.
ما هو الحل لإنقاذ الفسيلة ومواجهة الجفاف؟
بفضل الله، الحلول عملية ومجربة وبسيطة جداً وبتتلخص في نقطتين:
- إزالة الجريد بالكامل عند الزراعة:
يفضل تماماً قص وإزالة الجريد بالكامل ومساواته عند زراعة الفسيلة (وده هو النظام الناجح والمستخدم بكثرة في دولة العراق الشقيق)، والهدف منه هو إلغاء عملية النتح نهائياً، وبالتالي الفسيلة مش هتفقد ميه، وتوفر كل طاقتها ومحتواها المائي الداخلي لبناء الجذور الجديدة بأمان.
- تطبيق نظام "ري الشفتات":
النظام ده هو السحر اللي بيحافظ على رطوبة التربة حول الفسيلة باستمرار ويخليها تتشرب الميه ميكانيكياً لحد ما تعوض نقص الجذور. ويمكنك الاطلاع على تفاصيل هذا النظام المبارك بالكامل وشرحه خطوة بخطوة من خلال الرابط التالي: نظام "ري الشفتات" للفسائل | zera3amarket